“Cofia dy gyfamod byth”

Dirnad hynt y berthynas Gristnogol-Iddewig

21 Chwefror, 6 Mawrth a 20 Mawrth am 6.00pm ar Zoom

Mae'r berthynas rhwng Cristnogaeth ac Iddewiaeth yn ddwys, yn goeth ac yn gymhleth. Bydd ein hastudiaeth nos Fercher y Grawys yn amlygu sut y gall Cristnogion, yn arbennig, adnabod ac amgyffred y berthynas honno.

Mae’r Grawys yn amser teimladwy i fyfyrio ar y berthynas rhwng Cristnogaeth ac Iddewiaeth, gan fod yr Wythnos Fawr yn aml wedi bod yn foment o elyniaeth tuag at Iddewiaeth.

Bydd ein hastudiaeth nos Fercher y Grawys yn archwilio sut y gall Cristnogion ddyfnhau ein dealltwriaeth o Iddewiaeth, addysgu ein hunain am wrth-Iddewiaeth Gristnogol, a chamu i ddyfodol ffrwythlon o gydweithio rhyng-ffydd.

Wedi’u cynllunio i gynnull astudiaeth yn ystod y Grawys i’n cymuned yn y Gadeirlan, mae croeso cynnes i bawb yn y sesiynau o bob cwr o Esgobaeth Bangor, yr Eglwys yng Nghymru, a thu hwnt. 

Mae’r Grawys yn dymor wedi ei nodi nid yn unig gan ymwrthod a chan haelioni ond hefyd gan astudrwydd mewn gweddi a myfyrdod. Ein gobaith yw y bydd ein hastudiaeth nos Fercher y Grawys yn gyfle ar gyfer ffurfiant ysbrydol ym maes hanfodol a chyfredol y berthynas Gristnogol-Iddewig. 

Os ydych yn ystyried mynychu’r sesiynau ond heb fod yn rhan reolaidd o gymuned y Gadeirlan, cofrestrwch eich diddordeb ar-lein, er mwyn sicrhau y byddwch yn derbyn manylion mewngofnodi Zoom ar gyfer y sesiynau.

Astudiaeth mewn partneriaeth â Chyngor y Cristnogion a’r Iddewon

Rydym wrth ein bodd ein bod wedi gallu cyd-weithio â Chyngor y Cristnogion a’r Iddewon i gyflwyno ein hastudiaeth nos Fercher y Grawys eleni.

Wedi’i sefydlu ym 1942, yng nghanol erchyllderau’r Ail Ryfel Byd a'r Holocost, gan yr Archesgob William Temple a'r Prif Rabi Joseph Hertz, Cyngor y Cristnogion a’r Iddewon yw’r prif fforwm Prydeinig ar gyfer ymgysylltiad Cristnogol-Iddewig. Mae’r Cyngor yn rhoi cyfle i Iddewon a Christnogion gyfarfod, i rannu syniadau, i ddysgu am ei gilydd, ac i gyfrannu i’r fenter o adeiladu cymdeithas gryfach a mwy goddefgar. Mae’r Cyngor yn darparu addysg Holocost bwrpasol ar gyfer y gymuned Gristnogol, yn cefnogi myfyrwyr prifysgol trwy ei Raglen Arweinyddiaeth Campws, yn cynnull Rhwydwaith Gweithredu Rabïaid a Chlerigion, ac yn cydlynu agenda gweithredu cymdeithasol gynhwysfawr.

Bydd dau siaradwr o dîm cenedlaethol Cyngor y Cristnogion a’r Iddewon yn arwain sesiynau’n hastudiaeth nos Fercher y Grawys.