Y Sul hwn a'r wythnos o'n blaenau...

Messiah

Ar drothwy tymor dwys y Grawys, ymunwch â ni am 6.00pm nos Sul 11 Chwefror ar gyfer perfformiad defosiynol o Rannau II a III o’r Messiah gan George Frideric Handel.

Mae Rhan II o’r Messiah yn adrodd hanes Dioddefaint a marwolaeth Crist, ei Atgyfodiad a’i Ddyrchafael, a lledaeniad cyntaf yr Efengyl, gan arwain at gyhoeddiad gogoneddus o ogoniant Duw yng nghorws yr Haleliwia. Mae Rhan III’n archwiliad cyfrin mewn cân o’r addewid o dragwyddoldeb: “Mi wn fod fy Mhrynwr byw,” medd y soprano ar ei gychwyn; “Teilwng yw’r Oen” yw canmoliaeth y Corws ar ei ddiwedd.

Bydd y gerddoriaeth yn cael ei chanu gan Gôr y Gadeirlan, gyda’r unawdwyr ar gyfer yr ariâu hardd wed ei dwyn o’i rengoedd; a bydd y perfformiad yn cael ei arwain gan ein Cyfarwyddwr Cerdd, Joe Cooper.

Mynnwch docyn heddiw!

Datganiadau Cerdd dydd Iau

Mae ein datganiadau cerdd yn dechrau eto yr wythnos hon, yn dilyn gwyliau’r Nadolig. Bydd datganiadau’r tymor hwn yn cael eu cynnal bob dydd Iau am 1.15pm. Rhoddir y datganiad agoriadol ddydd Iau yma gan ein Cyfarwyddwr Cerdd ar yr organ, ac mae’n cynnwys Toccata a Ffiwg yn D leiaf Bach a’r toccata enwog o 5ed Symffoni Widor.

Pregethau ar drothwy’r Grawys

Mae ein pregethau yr wythnos hon a’r nesaf yn ein cynorthwyo i baratoi ar gyfer y Grawys. Heddiw, gyda’n Canon dros Fywyd Cynulleidfaol, rydym yn myfyrio ar sut i weddïo; y Sul nesaf, gyda’r Is-Ddeon, myfyriwn pa fodd i gyffesu; a dydd Mercher y Lludw, gyda’n Is-Ganon, myfyriwn pa fodd i ymatal.

Dydd Mercher y Lludw

Mae Dydd Mercher y Lludw, y diwrnod sy’n nodi dechrau’r Grawys, i’w gadw eleni ar 14 Chwefror. Dyma atgof da y dylem ni, yng Nghymru, ddathlu cariadon ar Ddiwrnod Santes Dwynwen, 25 Ionawr, gan fod i Ddydd San Ffolant berwyl gwell eleni. Ar Ddydd Mercher y Lludw offrymir y Cymun Bendigaid ar Gân ag Arddodi Lludw yn ddwyieithog yn y Gadeirlan am 12.30pm a hefyd am 6.00pm. Rhowch flaenoriaeth i’ch presenoldeb yn un o’r dathliadau hyn yn eich dyddiadur, fel y gall eich hymrwymiad i’r Garawys ddechrau’n fyfyriol, yn benydiol, yn sagrafenaidd ac yn brydferth. 

Nosweithiau Mercher eraill yn ystod y Grawys

Mae’r Grawys yn dymor wedi ei nodi nid yn unig gan ymwrthod a chan haelioni, ond hefyd gan astudrwydd mewn gweddi a myfyrdod. Cynigir gweithgareddau ar nos Fercher yn ystod y Grawys eleni fel offrwm i’n cyfoethogi’n ysbrydol. 

“Cofia dy gyfamod byth”Dirnad hynt y berthynas Gristnogol-Iddewig

Bydd ein cwrs astudio Grawys, ar-lein ar Zoom am 6.00pm ar nosweithiau Mercher 21 Chwefror, 6 Mawrth a’r 20 Mawrth yn archwilio cysylltiadau Cristnogol-Iddewig ar adeg dyngedfennol mewn dealltwriaeth rhyng-ffydd. Bydd y sesiynau hyn yn cael eu harwain gan y sefydliad rhyng-ffydd nodedig, Cyngor Cristnogion ac Iddewon. Ceir manylion llawn fan hyn.

28 Chwefror

Bydd ein cyfres o bregethau Grawys, sy’n canolbwyntio ar Gredo Nicea, yn cael ei harchwilio mewn sesiwn ar-lein arbennig ar Zoom am 6.00pm ar 28 Chwefror. Rydym wrth ein bodd mai’r Dr Robin Ward, Prifathro Tŷ San Steffan, Rhydychen, fydd yn arwain y sesiwn hon. 

13 Mawrth

Bydd y nos Fercher arall yn ystod Grawys, 13 Mawrth, yn cael ei chysegru i’n Cymun ar Gân misol newydd dros y Meirw, a gynhelir yn y Gangell am 5.30pm, a lle bydd gosodiad Fauré o’r Requiem yn cael ei ganu. 

Eto, rhowch flaenoriaeth i’ch presenoldeb yn eich dyddiaduron, er mwyn cyfoethogi’r Grawys yn ysbrydol ac yn weddigar.

Cefnogaeth

Mae popeth sy’n digwydd yn y Gadeirlan a Bro Deiniol yn cael ei gynnal gan eich haelioni chi. Trwy roi rhodd, rydych yn ein helpu i barhau â’n gwaith hanfodol.

Tanysgrifiwch i dderbyn hysbys ar e-bost am O'r Ddarllenfa ac hysbysiadau eraill o'r Gadeirlan a Bro Deiniol